సినిమా స్టయిల్లో చోరీ... వీడియో వైరల్!

అమెరికాలోని అట్లాంటాలో సినీ పక్కీలో జరిగిన ఓ చోరీ ఘటన వీడియో సోషల్ మీడియాలో వైరల్ అయింది. ఓ దుకాణంలో చోరీకి వచ్చిన ఇద్దరు దుండగులు ముందుగా షాపు సీలింగ్ లోకి చేరుకున్నారు. దుకాణంలో పని చేస్తున్న ఓ మహిళా ఉద్యోగి నడుచుకుంటూ వస్తున్న సమయంలో సీలింగ్ బద్దలు కొట్టుకుని ఆ దుండగులు కిందకు దూకారు. ఈ హఠాత్పరిణామంతో ఆ మహిళా ఉద్యోగి భయాందోళనలకు గురయింది. ఒక దుండగుడు ఆమెను బెదిరిస్తుండగా, మరో దుండగుడు కూడా సీలింగ్ నుండి కిందకు దూకాడు. 

వీరు ఇద్దరూ కలిసి ఆమెను ఓ గదిలోకి తీసుకువెళ్లి.. అక్కడ ఉన్న సేఫ్‌ను తెరిపించి.. అందులోని సొమ్మును తమ బ్యాగ్ లోకి సర్దుకున్నారు. ఆ తర్వాత ఆమెను అక్కడే టేపులతో బంధించి దుండగులు తాపీగా డోర్ తీసుకుని బయటకు వెళ్లిపోయారు. అట్లాంటా చెక్ క్యాషియర్స్‌లో జరిగిన ఈ దోపిడీలో మొత్తం 1,50,500 డాలర్లు అపహరణకు గురయినట్లు తెలుస్తోంది. దుండగులను నల్ల జాతీయులుగా అనుమానిస్తున్నారు. ఇందుకు సంబంధించి అక్కడి సీసీ కెమెరాలో రికార్డు అయిన దృశ్యాలు సోషల్ మీడియాలో వైరల్ అయ్యాయి.